Alhamdulillah, pada kesempatan ini admin diberi kesempatan untuk memposting kembali sebuah artikel untuk sahabat semua, silahkan disimak, semoga bermanfaat. Untuk membantu keberlangsungan website ini, kami persilakan kepada pembaca yang ada kelonggaran rezeki untuk berdonasi kepada para santri yang kami asuh dengan mengirim zakat, infaq, shodaqoh melalui rekening berikut, Semoga berkah, Amin.

#012 Khutbah Jumat Bahasa Jawa 8 Januari 2021 : "Bekal Masa Depan"

Keparenga kula caos pangemut-emut khususipun dhumateng kula piyambak sumrambah dumateng sedaya jamaah, sumangga sampun ngantos kendel utawi kendhat anggen kita terus usaha lan ikhtiyar murih saya ningkatipun taqwa kita dhumateng Allah SWT. Awit selaku tiyang mukmin kita kedah saget anggadhai aqidah ingkat kiyat, keimanan ingkang teguh, sahingga kanthi iman saha taqwa ingkang kiyat lan tegun, kita sedaya saged pikantuk predikat tiyang ingkang paling mulya ing ngarsanipun Allah. Makaten ingkang dipun dhawuhaken Allah wanten ing Kitab Sucinipun, Al-Qur’an Surat Al-Hujarat ayat 13 : “Saktemene wong kang paling mulya ing ngarsane Allah, ing antarane sira kabeh, yaiku wong kang paling taqwa marang Panjenengane”.

Mugi-mugi ayat dhawuhipun Allah punika saged saya nambahi gumregah lan gumregut ing semangat kita anggenipun badhe terus ningkataken ketaqwaan kita dhumateng Allah sarana nindakaken sedaya dhawuhipun lan nebihi sedaya awisan-awisanipun. Ing saklajengipun Allah ngendika wonten ing Surat Al Imran ayat 102 : “He wong-wong kang iman,  Sira kabeh padha taqwa-a marang Allah kanthi taqwa kang sabener-benere! Lan sira kabeh aja pisa-pisan mati kejaba tetep dadi wong Islam”. 

Saklajengipun keparenga kula paring pangemut-emut khususipun dumateng diri kula piyambak sumrambah dumateng jamaah Jumat sedaya mangga kita tansah ningkataken taqwa kita dumateng Allah SWT, amargi boten wonten sangu ingkang langkung sae ingkang saged paring keselametan dumateng kita wonten pagesangan fid diini wal akhirat kajaba namung taqwa. Inna akramakum indallahi atqakum, kanthi taqwa dumateng Allah SWT punika kita nglampahi pagesangan rina wengi ing donya punika.

Alhamdulillah, mangga kita tansah ngonjukaken raos syukur dumateng Allah Ta’ala ingkang nguwaosi sedaya alam jagad raya sakisinipun, ingkang taksih gesang utawi sampun pejah. Shalawat saha salam kita aturaken dumateng junjungan kita Nabi Agung Muhammad Shalallahu ‘Alaihi Wassalam ingkang sampun berjuang netepi perintahipun Allah ingkang paring pitedah dumateng sedaya umat akhir zaman dumateng mergi ingkang dipun ridhai Allah Ta’ala. Firman Allah :

“He wong-wong kang iman, taqwaa sira marang Allah lan saben wong gatekna apa kang wis dilakoni kanggo dina esuk (akhirat), lan taqwaa sira marang Allah, saktemene Allah Maha Mangerteni apa-apa kang wis sira lakoni” (Terjemah Qur’an Bahasa Jawa Surat Al Hasyr ayat 18).

Firman punika dipun wiwiti kanthi ajakan ingkang sanget pentingipun amargi boten saben tiyang ingkang dipunajak ananging namung tiyang-tiyang ingkang nggadhahi iman, seruan “Yaa Ayyuhalladzina amanu” artosipun namung tiyang-tiyang beriman. Abdullah bin Mas’ud Radhiyallahu ‘Anhu paring penjelasan bilih saben-saben firman Allah dipunwiwiti seruan ingkang ngajak tiyang-tiyang iman mesti dipunlajengaken dumateng perkawis ingkang khusus ingkang penting arupi perintah utawi larangan. Kados mekaten pentingipun seruan punika, ugi wonten Al Qur’an seruan punika dipunambali ngantos kaping 80, wonten Bahasa Arab, seruan “Yaa” saged dipun artosaken wonten Bahasa Indonesia “Hai” utawi “Wahai” wonten Basa Jawa “He”. Seruan punika kathah dipunginakaken wonten ing Al Qur’an “Yaa Ayyuha”, kados wonten seruan “Yaa Ayyuhannas”, Yaa Ayyuhal Muzzammil”, “Yaa Ayyuhal Insan”, “Yaa Ayyuhannabi”, lan sanes-sanesipun. Artosipun sami minangka seruan utawi ajakan tiyang-tiyang khusus, sahingga ayat ingkang dipun wiwiti seruan punika sejatosipun kagem tiyang-tiyang ingkang rumaos dipunajak.

Wonten bagian pertama ayat kala wau inggih punika Al Hasyr ayat 18, Allah Ta’ala paring seruan dumateng tiyang ingkang beriman kagem jagi mlihara taqwanipun dumateng Allah Ta’ala, perintah taqwa punika negasaken bilih wontenipun kesaksen boten wonten pengeran kejaba namung Allah lan Muhammad punika utusanipun Allah dereng cekap, kedah wonten usaha lan keikhlasan sakjroning taqwa inggih nyerahaken diri dumateng Allah Ta’ala kanthi pangarep-arep saged manggihi ridhanipun Ta’ala. Syukur dumateng sedaya nikmat, nindakaken sedaya perintah ugi nebihi sedaya awisanipun sarta tansah ikhlas nampi ujian nggih saktemenipun punika wujudipun usaha ngupados dateng ningkataken taqwa dumateng Allah Ta’ala. Perkawis sanesipun supados taqwa dumateng Allah tansah subur kita kedah tansah ngathah-ngathahi ibadah dumateng Allah Ta’ala kanthi raos tresna tanpa kepeksa, nyejahterakaken jamaah, ngathahi tadarus, istighfar nglampahi sunah ugi ngedalaken sedekah ingkang saged nguataken taqwa kita dumateng Allah Ta’ala. Punika sebabipun wonten ayat kasebat kita dipun tegur mawi kalimat : “taqwaa sira marang Allah lan saben wong gatekna apa kang wis dilakoni kanggo dina esuk (akhirat)”, inggih maksudipun bilih “dinten esuk” punika dinten akhirat. Tiyang-tiyang ingkang pados bekal ingkang sae mangka swarga dados balesanipun, ananging sinten tiyang ingkang lena wonten donya lan pados pesugihan donya kemawon ugi tansah ngelek-elek dateng sedherekipun mangka siksa Allah punika sanget pedih.

Surat Al Hasyr ayat 18 punika dipun akhiri kanthi “lan taqwaa sira marang Allah, saktemene Allah Maha Mangerteni apa-apa kang wis sira lakoni”, punika maknanipun nggih paring ketegasan bilih boten wonten satunggal tumindak utawi ucapan ingkang kita lampahi kanthi terang-terangan utawi meneng-meneng sejatosing boten bakal luput saking Allah ingkang Maha Mangerteni, mila punika kita kedah sadar bilih sedaya tumindak lan ucapan kita bakal dipunsuwun tanggungjawabipun sahingga kita kedahipun tansah ngathah-ngathahi tumindak lan ucapan ingkang sae kanthi nindakaken sedaya perintahipun Allah Ta’ala ugi nebihi sedaya awisanipun. Mangga kita ngempalaken bekal ingkang kathah kagem nengga dinten akhir kanthi nabung amal kabecikan, ningkataken ilmu lan amal, kathah sedekah lan ngukir prestasi dados generasi ingkang shaleh ingkang langkung sae malih, Amiin.